Ninguén morreu de ler poesía é unha instantánea do país da poesía, unha postal, unha guía de viaxes, un souvenir, un «estiven en Aldaolado e acordeime de ti». Pégao na porta do frigorífico. Técelle un tapete de fío e pono derriba da tele.
Aldaolado é un dúo poético formado por Lucía Aldao e María Lado desde 2005. Os seus espectáculos poéticos parten da poesía, do humor e da música para comunicarse directamente co público a través dunha posta en escena transgresora e transformadora. O seu primeiro espectáculo, de enorme éxito, titulouse "Onde estea un cubata que se quite un soneto", ao que seguiron outros como "Moita poesía, pouca diversión", "Con dez poemas por barba", ou "Cría fama e bótate a correr".