"Kailangan mong pagtiyagaan ang kiss ko dahil ang babaeng gusto mo ay may kini-kiss nang iba."

Siyam na taong gulang si Cheryl nang makilala niya ang isang estranghero sa park. Sinagip siya nito sa gutom, at sa malakas na buhos ng ulan ay hinayaan pa siya nitong magpahinga sa bahay nito. Mula noon ay natanim na sa isip niya na tama ang madalas sabihin ng mama niya na ang mga totoong superhero ay walang superpowers kundi nasa paligid lang. At ang mukha ng lalaking iyon ang naging mukha ng isang “hero” para sa kanya. Nanatili sa isip niya ang alaalang iyon ng kabataan niya.

Hindi niya inaasahan na pagkalipas ng mga taon ay muling magkukrus ang mga landas nila ng real-life hero niya—si Rod, ang bagong bodyguard na kinuha ng ama niya para bantayan siya mula sa faceless stalker niya. Hindi niya napaghandaan ang naging epekto ng muling pagkikita nila. Guwapong-guwapo na ito at napakaganda ng tindig at porma. Perpektong hero ito sa paningin niya, kaya lang ay tila wala itong pakiramdam. Ni wala itong reaksiyon sa muling pagkikita nila kahit nakilala naman siya nito.

“Yakapin mo ako,” utos niya para may makuha siyang reaksiyon mula rito.

Sumilay ang pamilyar na ngiti sa mga labi nito. Huli na para saluhin niya ang nalaglag niyang puso...